طبعًا كان أول واحد له تأثير في حياتي أبويا، لإن هو بدأ الإنتاج وأنا سني 11 أو 12 سنة تقريبًا، فكُنت بروح معاه الأستوديو وكانت حاجة مبهرة إني أشوف الآلات والموسيقيين وهم بيلعبوا وانت كطفل بتراقب تصرفاتهم من بعيد، وده اللي خلى عندي شغف إني أكون Star Maker صانع نجوم .. وبدأت تكبر معايا الحكاية مع مرور السنين.. إتعلمت منه إزاي الإحساس من ناحية الكلام واللحن والإنتاج نفسه، إزاي تقدر تصنّع أغنية .. هو أول حد إداني طاقة بعد ما منير وفؤاد وخالد عجاج سابوا الشركة، ومن هنا قررت إني أصنع ناس جديدة زي تامر وشيرين وبهاء سلطان. دايمًا كان بيشجعني، كان جمهوري اللي بثق فيه، تقريبًا كل حاجة اتعلمتها منه. شكرًا أبي
أمير من الناس المؤثرة في حياتي وهو رفيق الرحلة. بدأ أمير كمهندس صوت في فري ميوزيك.. بحس إن أمير ودني اللي بسمع بيها.. طبعًا ده غير إنه وزع حاجات كتير من شغل الشركة. 32 سنة هما عمر رحلتي مع أمير محروس، عاش معايا مراحل النجوم كلها، فؤاد، منير، محمد محي، عاشق الساكس، تامر، شيرين، بهاء سلطان، يعني تقريبا مفيش مرحلة من مراحل حياتي أمير مكانش مشاركني فيها كفريق مع بعض. وأكيد شهادتي مجروحة فيه، لكن فعلًا أمير محروس من أشطر وأفضل مهندسين الصوت.. اشتغلت معاه وخرجلي شغلي زي ما أنا عايز وأفضل، ده غير إن أمير بدأ كموزع موسيقي في شركة فري ميوزيك وكان له نصيب الأسد في نجاحات كتير من أبطالها التوزيع الموسيقي. حبيبي يا أمير، انت رفيق الرحلة
أميرة.. غير إنها مؤثرة في حياتي بشكل عام، هي عامود من أعمدة الشركة.. لإن أميرة يا دوب خلصت الهاي سكول ومرحلة تعليمها الجامعية وهي بتشتغل معايا في فري ميوزيك. كانت الـ Power .. اشتغلت معايا سكرتيرة ومديرة حسابات، اشتغلت كل حاجة ، لإن في البداية كان لسة مش معايا فلوس أجيب موظفين، فكُنا بنعمل كل حاجة بإيدينا أنا وهي. رأيها مهم عندي في كل حاجة بعملها وكانت دايمًا تشجعني، ده غير إنها دايمًا السند في مشاكلي مع الفنانين. تعبت معايا في الرحلة أوووي، 32 سنة مرحلة الكاسيت ومصنع شرايط الكاسيت إلى يومنا هذا في كل منصات البيع الديجيتال.. حبيبتي يا أميرة انتي أغلى حاجة في حياتي، معايا من أول طوبة بنيتها في الشركة.. بشكرك
هاني محروس أول حاجة لازم تعرفوها عنه إنه مش مجرد أخويا الصغير، لأ ده إبني.. وبعد أبويا الله يرحمه في تربيته لهاني كان ليا أنا الدور الثاني المؤثر في حياة هاني. بدأ هاني شغل في فري ميوزيك من وقت ألبوم بابا فين، يعني تقدروا تقولوا إن هاني معايا من 2001 إلى وقتنا هذا، اشتغل معايا لتامر وشيرين وبهاء سلطان وسوما ودياب، وبحب إختياراته جدًا. بس طبعًا هاني دلوقتي بقى منتج كبير ومن أكبر مهندسين الصوت اللي اتشرفت بالشغل معاهم. شكرًا حبيبي يا هاني
نرمين آخر العنقود .. ونرمين مش أختي بس، لأ دي بنتي وأول ما خلصت الجامعة وفكرت في الشغل قولتلها تعالي اشتغلي معايا، وفعلًا وافقت انها تشتغل بس أنا ماكنتش عارف هتشتغل إيه.. وفي الوقت ده كانت السوشيال ميديا بتظهر للنور، فهي اللي مسكت السوشيال ميديا لشركة فري ميوزيك، وفضلت تطور من نفسها لغاية ما بقت من أجمد الناس المتمكنة في السوشيال ميديا وهي اللي مسئولة عن شغل السوشيال ميديا لكل نجوم الشركة. وده معناه إنها ماسكة صفحات كتير ودي مسئولية كبيرة بس إنتي قدها.. حبيبتي يا نرمو شكرًا